Offentleg ettersyn av formannskapets innstilling til Budsjett 2011 – Økonomiplan 2011 – 2014

Med heimel i Kommunelova §§ 44.7 og 45.3, vert Formannskapet si innstilling til årsbudsjett 2011 og økonomiplan 2011 – 2014 for Vinje kommune, lagt ut til offentleg ettersyn. For utan kommunens heimeside, er dokumenta tilgjengelege på biblioteka i Edland, Rauland og Åmot, samt kommunens Tenestetorg. Kommunestyret tek endeleg stillling til budsjett og økonomiplan i møte torsdag 16. desember.

I framlegget har formannskapet reservert seg mot reduksjon i talet på legekontor, slik rådmannen foreslo. Elles går ein inn for uendra straumpris. Støtte til enøk-tiltak for bedrifter og private held fram. Kuttlista for å få driftsbudsjettet i balanse ligg som siste vedlegg i dokumentet.

Det er gjort framlegg om investeringar på 198,7 mill. kr (eks avsetjing til kapitalfond) i økonomiplanperioden, av dette 77,1 mill. kr i 2011. Dette er ein reduksjon på 70 mill. kr i planperioden. Det er no løyvd vel 78,8 millionar til Åmot skule. Nytt bustadfelt på Rauland, Krontveit, ligg inne med tilsaman 20 millionar i 2010 til 2012.

Vidare er satsinga på tilrettelagde bustader følgt opp med ny løyving i 2011 på 11 millionar. Av nye tiltak kan ein nemne nytt tak på Vinje kyrkje og utskifting av vatn- og avløpsnett i Edland/Haukeli. Elles er rulleringa av investeringsplanen prega av kostnadsauker på tilsaman 17 millionar på allereie igangsette prosjekt. 

Sist oppdatert 06.12.2010