Ny kraftutbygging i Tinn og Vinje - besøk til Suldal for å hente erfaringar

Ein delegasjon frå Tinn og Vinje kommunar besøkte i går Kvilldal kraftverk og Saurdal pumpekraftverk i Ulla-Førre. Kvilldal kraftverk er Noregs største kraftverk, herfrå går også utanlandskabelen til England.

Me har óg hatt møte med leiing og nøkkelpersonar i Suldal kommune, for å hente erfaringar frå deira arbeid med konsesjonshandsaming og vilkårsrevisjonen i Røldal-Suldal.

Besøket er ledd i førebuing av kommunane sitt arbeid med utvidings- og opprustningsplanane som Statkraft og Hydro har lagt fram, og som vil koma til konsesjonshandsaming truleg tidleg i 2026. Som kjent er oppgradering og bygging av nye kraftverk m.a med pumping av vatn frå Tinnsjøen til Mår/Kalhovdfjorden og Møsvatn aktuelt.

Suldal kommune er Noregs største kraftkommune og har stor kunnskap om vasskraft. Tinn og Vinje er óg av dei største kraftkommunane i Noreg, me har stor nytte av erfaringsutvekslinga.

Arbeidet vidare i Vinje

Kommunestyret i Vinje handsama i møte 16. september sak 76/2025, om oppgradering av vasskraftproduksjon i Tinn kommune. Vedtaket som blei gjort var fylgjande:

Vinje kommune set i gang arbeidet med å ivareta lokalsamfunnet Møsstrond, økosystemet og kommunens interesser i samband med Hydro sine planar om oppgradering av kraftproduksjonen på Rjukan. Arbeidsgruppa blir utvida med inntil 2 representantar utpeika av Møsstrond Grunneigarlag.

Dei som sit i arbeidsgruppa er då:

• Gry Åsne Aksvik, kommunalsjef for Økonomi og samfunn
• Turid Opsund, rådgjevar plan
• Kjell Christenson, rådgjevar næring
• Per Wraa, landbruksrådgjevar
• Tone Aanderaa Kiste, Kraftkompetanse KO
• Kjetil M. Vaagen, konst. kommunalsjef for Teknisk drift og infrastruktur
• Jan Myrekrok, kommunedirektør
• Halvor Lien og Jan Henning L'Abee-Lund, representantar valt av Møsstrond grunneigarlag

Det vil bli eit ope møte på Hovden på Møsstrond 8. oktober. Meir informasjon kjem seinare.