Framtidsretta bu- og omsorgsløysingar i Vinje

Vinje kommune arbeider for tida med å utvikle gode og framtidsretta bustadløysingar for innbyggjarane våre. Det overordna målet er å kunne utvikle buformer som bidreg til tryggleik, livskvalitet og meistring gjennom ulike livsfasar, også når behovet for helse- og omsorgstenester aukar.

Bu- og omsorgsløysingane skal legge til rette for at innbyggjarane våre kan bu trygt og sjølvstendig så lenge som mogleg, samstundes som kommunen kan tilby gode og berekraftige helse- og omsorgstenester tilpassa innbyggjarane sine behov. Dette omfattar utvikling av heile spekteret av bustad- og omsorgstilbod, frå eigen bustad og tilrettelagde bustader, til omsorgsbustader og sjukeheim.

For å lukkast må kommunen planleggje bustader, tenester, teknologi og nærmiljø i samanheng. Dei vala som blir gjort i dag vil vere avgjerande for korleis Vinje kan levere gode tenester i framtida.

• Vinje kommune har informasjon og analysar som gjev oss grunnlag for å planlegge bustadutviklinga dei komande 15 åra.
• Basert på kommunen si demografiske utvikling har Agenda Kaupang berekna at innbyggjarane fram mot 2040 vil etterspørje kring 200 sentrumsnære bustader. Samstundes er kommunen tilrådd å byggje 20-24 omsorgsbustader både i Åmot og på Rauland.
• Med atterhald om politisk godkjenning, vil Vinje kommune i løpet av dei neste to åra starte byggeprosessar i Åmot og Rauland rundt utbygging av aldersvennlege bustader, omsorgsbustader, sjukeheim og Vinje helsesenter.
• For Øvre Vinje er behovet for omsorgsbustader i denne omgang dekt gjennom utbygginga som no går føre seg ved Norheimstunet.
  

Dine innspel er viktige!

For å kunne utvikle gode løysingar som møter framtidige behov, ynskjer me innspel og medverknad frå innbyggjarane. Me inviterer difor til ei kort spørjeundersøking, og opne møte på Rauland og i Åmot, der du kan kome med innspel og erfaringar.