Tilbod til pårørande i Vinje

Avdelingane Vesleheimen og Furuly ved Vinje sjukeheim tek i bruk TID modellen for å førebygge og handtere uro og annan utagerande åtferd ved demens.

Dette er ein kunnskapsbasert metode som gir personalet ein systematisk måte å arbeide for gode tiltak saman med pasienten og pårørande.

Informasjon til pårørande

Kva er TID?

TID står for Tverrfagleg Intervensjonsmodell ved utfordrande åtferd ved Demens og andre komplekse tilstandar. TID er ein metode for å forstå pasienten sin situasjon, finne forklaringar og lage persontilpassa tiltak.

Kvifor brukar me TID?

Målet er å skape betre behandling, tryggheit, føreseielege tenester og betre livskvalitet. Modellen hjelper personalet til å sjå heile personen; både fysiske, psykiske og sosiale forhold. Modellen gir ein struktur for personalet som gjer det lettare å finne gode løysingar og tilpasse omsorga i kvardagen.

TID-modellen i tre fasar

TID består av tre fasar som gir personalet ein tydeleg og systematisk måte å arbeide for gode tiltak saman med pasienten og pårørande.

1. Utgreiing

• Samtaler med pasient og pårørande om livshistorie, vanar og tidlegare fungering, og kva som er viktig for pasienten.
• Systematisk observasjon og kartlegging av symptom og åtferd.
• Undersøking og kartlegging av fysiske, psykiske, sosiale og miljømessige forhold.
• Gjennomgang av medisinar.

2. Refleksjon

• Helsepersonell møtest i strukturerte refleksjonsmøte, der pasienten sitt perspektiv er sentralt.
• Ein deler observasjonar og drøfter saman moglege forklaringar.
• Det blir utarbeidd ein tiltaksplan basert på pasienten sine behov og ressursar.
• Pårørande kan delta i refleksjonsmøte ved behov, eller etter eige ønske.

3. Tiltak og evaluering

• Tiltak blir testa ut i praksis.
• Tiltak blir evaluert kontinuerleg slik at omsorga og behandlinga blir tilpassa fortløpande.

Pårørande si rolle

Pårørande kjenner personen best og bidreg med informasjon om:

• Livshistorie, interesser og verdiar.
• Vanar og korleis personen tidlegare handterte liknande situasjonar.
• Kva som skapar tryggheit eller uro.

Dette gjer tiltaka meir treffsikre og personsentrerte.

Kva betyr TID for pasienten?

• Meir føreseielege tenester, tryggheit og betre livskvalitet.
• Mindre uro og færre plagsame symptom.
• Individuelt tilpassa tiltak.
• Heilheitleg oppfølging frå eit tverrfagleg team.

Vil du vite meir?

Se www.tidmodell.no Lenke til et annet nettsted., for meir informasjon om modellen.

Dersom den du er pårørande til får hjelp frå kommunen, og du ynskjer ei samtale, eller har spørsmål, så er du velkomen til å ta kontakt med oss. Ta kontakt med avdelinga der den du er pårørande til får hjelp. Avdelinga har eit spesielt ansvar for å ivareta deg som pårørande. Du kan snakke med alle tilsette i avdelinga, men du kan også be om å få snakke med avdelingsleiar eller primærkontakten til den du er pårørande til. 

Primærkontakt

Ein primærkontakt har eit ekstra ansvar for å fylgje opp den du er pårørande til, og for å ha dialog med deg som er oppført som nærmaste pårørande. Primærkontakten har også ansvar for å sikre at born og unge under 18 år som er pårørande blir fylgt opp.
Dersom du er usikker på kven som er primærkontakt, kan du spørje leiar for avdelinga. Dersom den du er pårørande til mottek hjelp frå fleire tenester, er det primærkontakten i den tenesta som blir nytta mest, du skal forhalde deg til.

• Koordinering og tildelingskontoret Åpnes i nytt vindu.
• Kontaktinformasjon til dei ulike verksemdene under Helse og meistring i Vinje kommune finn du her Åpnes i nytt vindu.

Spørjeundersøkinga Ivaretatt

Vinje kommune har tatt i bruk den nasjonale spørjeundersøkinga Ivaretatt. Det er ei elektronisk undersøking som gjeng føre seg kvart år mellom 1. desember og 31. mars.

Les meir om undersøkinga her Åpnes i nytt vindu.

Du kan klage  dersom du som pårørande har hatt ei negativ oppleving med kommunen, og ynskjer å gje ei tilbakemelding om dette.

Kva kan eg klage på?

• At du ikkje har fått tilbod om teneste du har søkt om
• Tilhøve ved tenestene som du ikkje er nøgd med
• sakshandsaminga
• andre kritikkverdige tilhøve

Korleis klagar eg?

Klaga sender du skriftleg til Vinje kommune, Vinjevegen 192, 3890 Vinje eller sender på e-post til edialog.no. Dersom du har søkt om tenester frå kommunen, får du eit vedtaksbrev med svar. Her får du også informasjon om korleis du kan klage på vedtaket.

Kva skjer etter at eg har klaga?

Dersom me ikkje endrar vedtaket, så blir klaga sendt vidare til statsforvaltaren.